Abeletxe izenez ezaguna, Bilbon jaioa eta bertako bizilaguna, nahiz eta haurtzaroan Ermuan bizi izan zen. Euskal kulturarekin eta euskarari dagokion guztiarekin oso konprometitua.

Kazetari eta idazlea, antzerkigile eta poeta, egunkari ugaritan kolaboratzen eta laguntzen zuen, baita antzezlanetan eta abarretan ere. Gerra Zibilean Eguna egunkaria sortu zuen, euskara hutsean idatzitako lehena. Gerra Zibilaren eta erbestearen ondoren, Bilbora itzuli zen, eta han Salostar inprimategia sortu zuen Deustun. Bertan egindako argitalpenengatik atxilotu zuten.

Jon semearekin batera, Txinpartak Euskal-Antzerki-Taldea sortu eta aurrera atera zuen 1951n, festa askotara joanez. Antzerki eta dantza talde ugari sortu zituzten, beti euskal kulturaren inguruan.